У гэтыя кастрычніцкія дні прафесар кафедры філалогіі Алена Белая наведала Жыліцкую сярэднюю школу, якая знаходзіцца ў Кіраўскім раёне Магілёўскай вобласці і якую Алена Іванаўна ў свой час скончыла. Жылічы, малая радзіма Алены Іванаўны, слаўная тым, што тут нарадзіўся адзін з пачынальнікаў беларускай літаратуры пісьменнік Ядвігін Ш. (Антон Іванавіч Лявіцкі, 1868—1922). Яго бацька працаваў упраўляючым у маёнтку пана Булгака. Зараз гэты маёнтак актыўна рэстаўруецца і прымае гасцей з розных рэгіёнаў Беларусі і замежжа як помнік архітэктуры ХІХ ст.
Алена Іванаўна сустрэлася з вучнямі 9-11-х класаў, правяла гутарку аб гісторыка-культурнай значнасці малой радзімы, дзе кожны чалавек бярэ старт у вялікае жыццё, а таксама расказала і правяла прэзентацыю матэрыялаў пра Баранавіцкі дзяржаўны ўніверсітэт, які варты выбару кожнага мэтанакіраванага выпускніка. На завяршэнне сустрэчы Алена Белая і Аляксей Белы прачыталі вучням свае вершы, прысвечаныя малой радзіме, і падарылі ім паэтычныя зборнікі.
